Најмал временски период за записникот од М-НАВ е една недела – Томовска со апел да се остават инспекторите професионално да ја завршат работата
Директорката на Државен инспекторат за труд, Весна Томовска денеска во изјава за медиумите посочи дека извршениот надзор во М-НАВ е согласно владината одлука.
Таа вели дека станува збор за пообемен надзор, за кој најмал временски период во којшто може да се изготви записникот е една недела.
„Согласно Законот за инспекциски надзор, ние имаме рок за изготвување на ваквите инспекциски надзори подолг временски рок. Значи, да оставиме да си ја завршат инспекторите професионално работата, да ги утврдиме сите факти и докази како би можела јавноста да не има понатамошни шпекулации во делот на она како и што се случило во делот на постапките за вработување кај работодавачот“, посочи Томовска.
Томовска упати апел да се остават инспекторите професионално да ја завршат работата, да ги утврдат сите факти и докази за да не се појават понатамошни шпекулации во јавноста, а додаде и дека инспекторатот во претходните години нема извршено инспекциски надзор во М-НАВ.
„Надзорот во М-НАВ е направен согласно одлуката на Влада. И да, во претходните години немаме извршено инспекциски надзор. Меѓутоа, без разлика дали ќе имаше ваква одлука Инспекторатот постапува и по допрен глас во услови кога има одредени неправилности коишто укажуваат во делот на правата од работен однос“, рече Томовска и додаде дека и финансиската полиција извршила надзор во М-НАВ, па најверојатно ќе треба да се координираат, за да се одлучи дали надзорот ќе се прошири или ќе остане.
Прашана дали ќе се прошири истрагата во М-НАВ по обвинувањата дека таму се вработени роднини на одредени функционери, Томовска посочи кога станува збор за вработен, нерелевантно е чиј роднина е.
„Кога станува збор за вработен, за нас е неважно е чиј роднина е. За нас сите се вработени. Така што, доколку постои повреда на право од работен однос или незаконита постапка на вработување, во тој случај за нас важен е поимот вработен и работник. Дали е тој роднина на кој било, за нас е ирелевантно. Значи, надзорот ќе се спроведе на начин и постапка согласно закон. Инспекторатот не врши истрага. Инспекторатот спроведува инспекциски надзор. За истрага е задолжен друг орган“, додаде Томовска.
