НА ЧЕКОР ДО СКРАТУВАЊЕ НА РАБОТНАТА НЕДЕЛА: Eвропска земја сака да ја зголеми продуктивноста на работниците
Шпанија е на чекор да ја скрати работната недела.
Доколку законот биде изгласан, скратеното работно време би се однесувало на околу 12,5 милиони вработени во приватниот сектор – како на полно така и на скратено работно време, а се очекува дека мерката ќе ја зголеми продуктивноста и ќе го намали отсуството од работа, објави шпанското Министерство за труд. Оваа мерка, која веќе важи за државните службеници и одредени други сектори, најмногу би влијаела на трговијата, производството, угостителството и градежништвото
„Денес го модернизираме светот на трудот и им помагаме на луѓето да бидат малку посреќни“, изјави министерката за труд Јоланда Дијаз.
Владата на Педро Санчез нема јасно мнозинство во парламентот, па законот ќе мора да помине на гласање за да стапи на сила.
Главните синдикати ја поддржаа оваа иницијатива, за разлика од деловните здруженија кои изразија резервираност.
Предлог-законот доаѓа од партијата Сумар, малцинскиот, тврдо левичарски партнер на Социјалистичката партија на Санчез.
Каталонската националистичка партија Жунтс, повремен сојузник на коалицијата, изрази загриженост за негативните последици што пократката работна недела би можела да ги има врз малите бизниси и самовработените.
foto freepik.com
