НА 51 КИЛОМЕТАР ОД КУМАНОВО: Кумановци одат на шопинг во Косово
Кумановци одат на
шопинг во косовскиот град Гнилане. Тој се наоѓа на 51 километар од Куманово. Го
посетуваат Албанци, a во помал број и Македонци, пред сè поради евтината гардероба. Граѓаните се
групираат со приватни возила или патуваат со автобус.
„За време на
продолжениот викенд за првпат бев во Гнилане. Од пријатели слушнав дека биле
претходно на шопинг. Ми посочија неколку локации во градот каде пазареле. Има евтина гардероба, но и цените во
угостителските објекти се прифатливи, а што се однесува до маркетите, цените се
тука некаде како нашите или дел од продуктите се поскапи. Купивме облека за
возрасни, за децата, мала греалка, бевме
на скромен ручек и се вративме назад. Во однос на јазикот, дел од продавачите
зборуваа српски јазик и немавме проблем со комуникацијата. Се стига за брзо
време, така што во еден ден имате време да прошетате по дуќани, да разгледате, да купите ако нешто ви одговара и да се вратите“, вели наш соговорник.
Друга жителка на
Куманово објаснува дека на секои два месеци оди во Гнилане.
„Јас одам на 2
месеци за да купам гардероба. Има евтини работи и за облека и за обувки. Има и
попусти за празници како Нова година на пример или кога се паѓа Black
Friday. Знам и други луѓе што одат,
претежно Албанци, но и Македонците можат да одат, зошто да не?“, рече Веса С. од Куманово.
Некои од жителите
на Куманово и Липково имаат и роднини во соседно Косово и тоа е причина плус поради која го посетуваат. Дел од локалните
туристички агенции велат дека во зима посетеноста е помала, а во лето очекуваат
повеќе патници. Додаваат дека на шопинг во Косово повеќе одат жените. Некои од скопските
туристички агенции организираат и шопинг тури во Приштина и Призрен, но и во Урошевац.
Конкретно за Косово, дел од медиумите пишуваа дека државата има трговски
центри, граѓаните ги посетуваат, таму го поминуваат слободното време, но за
сметка на тоа ретко посетуваат културни настани. Што се однесува за нашите граѓани, тие одат на шопинг тури во Врање во Србија, во бугарскиот главен град Софија и во Солун во Грција. Турите обично се организираат за викендите.
Сања Атанасовска
foto Wikipedia/Planeti
