МЗТ без мака го преслуша ТФТ и си осигура плејоф во АБА2-лигата (ФОТО)
Аеродромци беа апсолутно подобар противник на средбата одиграна на турнирот во Широки Брег, во која триумфот го најавија уште на самиот старт кога со 11 поени во серија дојдоа до првото двоцифрено водство (13-3). Македонскиот шампион набрзо потоа дојде и до плус 14 (26-12), со што дојде до победничка предност која потоа само умешно ја одржуваше до самиот крај. Сино-белите во второто полувреме во неколку наврати имаа плус 20, а највисоката предност изнесуваше 24 поени (81-57), како доказ за огромната доминација на паркетот.
Марко Баковиќ со 22 поени и осум скока беше најдобар кај „металците“, а веднаш зад него со учинок беше Харис Делалиќ со 20 поени. Американецот Верц со 14 и Андреј Ташовски со 13 поени беа најпрецизни кај ТФТ.
МЗТ сега има скор 8-3 со што на крајот од 11. коло најлошо што може да бидат пласирани е на третата позиција на табелата. Во следната рунда, македонскиот првак в петок ќе ги одмери силите со екипата на Златибор (15 часот), директен ривал за највисок пласман, додека ТФТ ден претходно ќе ги одмери силите со Војводина (21 часот). Три часа претходно задутре својата пресметка ќе ја одигра и Пелистер против Подгорица.
