Муртезани на средба со генералната директорка за европски фондови на Шпанија
Министерот за европски прашања, Орхан Муртезани, денеска во Мадрид оствари средба со генералната директорка за европски фондови при Генералната дирекција за Европски фондови на Кралството Шпанија, Ана Кристина Пења Санчез, на која што се разговараше за предизвиците и можностите во користењето на европските претпристапни фондови и за идните насоки на соработка меѓу двете земји во оваа сфера.
Фокусот на разговорите беше ставен на иднината на ЕУ фондовите за земјите кандидатки за членство во Унијата, во контекст на Планот за раст и Реформската агенда. Муртезани и Пења Санчез разменија мислења за потребата од систематско градење и зајакнување на административните капацитети, со цел поефикасно искористување на достапните европски средства. Разговорите опфатија и теми за креирање на зрели инвестициски проекти, како предуслов за брза и ефикасна апсорпција на средства. Исто така, на средбата се дискутираше и за модалитетите како да се обезбеди долгорочна одржливост на резултатите од ЕУ финансираните програми и проекти.
Министерот Муртезани го презентираше досегашното искуство на Северна Македонија во користењето на средствата од ИПА, нагласувајќи дека, државата презеде сериозни чекори за да ги надмине идентификуваните слабости, особено преку воспоставувањето на подобрена институционална рамка во ИПА 2021-2027. Тој посочи дека, иако имплементацијата е сè уште во рана фаза, наредните две до три години ќе бидат клучни за да се оцени ефикасноста на направените подобрувања.
Во рамките на разговорите беа разгледани и можностите за споделување на знаење и најдобри практики од спроведувањето на ЕУ Инструментот за закрепнување и отпорност (RRF) за земјите членки на ЕУ, со цел да се искосристат искуствата за унапредување на вештините и пристапот на администрацијата во нашата земја во користењето на новите механизми на европска поддршка, како што е Инструментот за реформи и раст за земјите од Западен Балкан.
