„Можеби сме на прагот на нешто важно за целиот свет“: Што изјави пратеникот на Трамп за Путин?

Претставникот на американскиот претседател Стив Виткоф три дена по средбата со Владимир Путин изјави дека рускиот претседател сака „траен мир“ во Украина.

„Можеби сме на работ на нешто многу, многу важно за целиот свет“, рече Виткоф синоќа во интервју за американскиот канал Фокс њуз.

Американскиот претседател Доналд Трамп сака да стави крај на војната во Украина и ја прекина дипломатската изолација што Западот му ја наметна на неговиот руски колега за да разговара за тоа.

Неговата администрација одржува одделни разговори со високи руски и украински претставници, но досега тие разговори не доведоа до сеопфатен прекин на непријателствата.

Дипломатските преговори продолжуваат, без решителни отстапки од Москва. Киев и некои западни земји ја обвинуваат Русија, чија армија е поголема и подобро опремена на фронтот, дека намерно ги запира преговорите.

Виткоф се сретна со Путин во петокот во Санкт Петербург по трет пат откако Трамп се врати во Белата куќа во јануари.

Состанокот, кој траеше повеќе од четири часа, на кој присуствуваа двајца блиски советници на рускиот претседател, Јуриј Ушаков и Кирил Дмитриев, се покажа „убедливо“, рече американскиот претставник, додавајќи дека се појавуваат „контурите“ на мировниот договор.

Виткоф рече дека „трговските можности“ меѓу САД и Русија се дел од преговорите и дека тоа може да „донесе вистинска стабилност во регионот“.