Министерот Бесими се пофали дека купил граѓанска обврзница, ќе ѝ ја подари на ќерка си

Министерот за финансии Фатмир Бесими, на службениот фејсбук профил се пофали дека купил граѓанска обврзница која ќе ѝ ја поради на неговата ќерка. Ова, како што наведува, го направил за да го илустрира процесот на инвестирање и придобивките од новиот инструмент, кој го промовира Министерството за финансии.

„Денеска решив симболично да купам една ‘Граѓанска обврзница’ за да го илустрирам процесот на инвестирање и придобивките за граѓаните и земјата:

1. Поднесов барање до банката за купување хартии од вредност – „Граѓанска обврзница“,
2. Банката ќе ме извести за резултатот од аукцијата што ќе се одржи на 13 јули 2023 година,
3. Сопственоста на граѓанските обврзници ќе се евидентира во Депозитарот за хартии од вредност на 20 јули 2023 година“, пишува Бесимик во постот.

Оваа инвестиција од 10.000 денари, како што посочувам, се очекува две години по ред да му носи принос од 500 денари, и тоа на 20 јули 2024 година и истиот датум во 2025 година кога ќе му биде вратена вложената вредност од 10.000 денари.