Мицкоски најави нова чистка: По првите шест, се одземаат лиценци на уште неколку фирми за канабис
Чистката во бизнисот со канабис продолжува, а наскоро се очекуваат и нови одземени дозволи за работа, најави премиерот Христијан Мицкоски. Тој откри дека по веќе одземените шест лиценци на правни лица кои не работеле согласно законот, на наредната владина седница истата судбина ја чекаат уште неколку други компании.
Мицкоски потенцираше дека за случаите каде веќе се покренати истраги и се запленети количества на марихуана, јавноста допрва ќе ги дознае деталите за тоа што навистина се случувало. Премиерот упати остри критики кон претходната власт, обвинувајќи ја за промовирање на „штетни и недржавни канабис-политики“ кои, според него, ќе остават негативни последици во наредната деценија.
„Исто како што улиците се исчистија од криминал, така доаѓа времето кога ќе ја исчистиме државата од политичките криминалци,“ порача Мицкоски во телевизиското гостување, уверувајќи ги граѓаните дека ситуацијата е под целосна контрола и дека бескомпромисната борба против нелегалните текови продолжува.
