Мециновиќ: Состојбата со сметот во Скопје е апсолутен крах на локалната власт

Кандидатот за градоначалник на Скопје, Амар Мециновиќ, денеска на прес-конференција оцени дека сегашната состојба со комуналниот отпад во градот е „апсолутен крах на локалната власт“. Тој го критикуваше раководството на Град Скопје и општините, нагласувајќи дека четири години власт на ВМРО-ДПМНЕ не донела решенија за проблемот со сметот.

– Ние сметаме дека, без разлика кој ќе ја добие поддршката за градоначалник, веднаш треба да се започне со санирање на состојбата. Го повикувам сите градоначалници кои победија во првиот круг или се во втор круг, да бидат подготвени веднаш по изборите заедно да почнеме со чистење и уредување на КХС – рече Мециновиќ.

Тој истакна дека политичките суети не смеат да влијаат на работата на градоначалниците и дека е потребно да се промени перцепцијата за локалните власти како елитни и оддалечени од граѓаните.

– Јас повикувам на натпартиска мобилизација против владината замисла за водење на градот, бидејќи оваа Влада го доведе градот на работ на колапс – нагласи Мециновиќ.

Во однос на КХС, тој истакна дека се спрема план за јавно-приватно партнерство, но потенцира дека неговиот тим ќе инсистира на континуирано одржување на хигиената и окрупнување на капацитетите на градската хигиена. Мециновиќ најави и можност за преработка на комуналниот отпад за производство на деривати на гориво, за што неговиот тим веќе стапил во контакт со светски експерти.

– Ова е начин не само да се реши проблемот со сметот, туку и да се искористат ресурсите на градот за одржлив развој – додаде тој.