Масовниот убиец од Прага бил инспириран од русинка
Дејвид Козак, студент на Филозофскиот факултет на Карловиот универзитет во Прага, во четвртокот уби 15 лица и рани 30 во зградата на факултетот, наводно инспириран од пукање во училиште во Русија.
Како што пишува „Тајмс“, заклучокот за тоа каква инспирација бил донесен е врз основа на објавите на Козак на мрежата Телеграм, каде што тој наводно објавил дека „Алина Афанаскина премногу му помогнала“.
“Отсекогаш сакав да убивам, мислев дека во иднина ќе станам манијак. Сфатив дека е многу поисплатливо да се прават масовни убиства отколку сериски. Седнав. Чекав. Сонував. Сакав … но Алина стана последната точка.Како навреме да ми дојде помош од рајот“, наводно напишал на таа социјална мрежа.
Да потсетиме, во пукањето во училиштето во Брјанск, Русија, што се случи на почетокот на месецов, загина едно девојче, додека пет ученици се повредени. По пукањето, Алина изврши самоубиство.
Алина Афанаскина тој ден доцнела, влегла во училницата каде била и нејзината сестра близначка. Двете сестри оделе заедно на училиште, иако инспекторите сугерирале дека сестрата веројатно не била свесна за плановите на Алина. Пукањето се случило во гимназијата.
– Слушнавме звуци, удирање, мислевме дека топката удри во ѕид, мислевме дека доаѓа од часот по физичко. Но, наставникот излезе во салата и рече: „Не, ова е нешто страшно“. И две мали девојчиња дојдоа по неа. Рекоа дека пукаат… Почнаа да се забарикадираат. Момчињата ја блокираа вратата со маси, едно од девојчињата повика полиција – изјави тогаш еден ученик.
Според руските медиуми, учениците изјавиле дека девојчето е „многу чудно, не била активна на социјалните мрежи и едвај комуницирала со соучениците“.
Ловечкото оружје од кое е извршено пукањето е регистрирано на таткото на девојчето.
Дејвид наводно на социјалната мрежа Телеграм изјавил дека ќе изврши масакр на универзитетот и дека можеби ќе се самоубие. Пишуваше на руски, а истакна дека е инспириран од Алина. Тој наводно напишал дека таа не убила доволно луѓе и дека наводно ќе се обиде да го поправи тоа.
