Манипулативни изјави или дијалог? Тензиите меѓу МНР на Бугарија и Македонија продолжуваат
Бугарското Министерство за надворешни работи ја изрази својата сериозна загриженост поради, како што велат, континуираниот неконструктивен пристап на официјално Скопје и повторливите нејасни и манипулативни изјави.
Во соопштението, МНР на Бугарија наведува дека Северна Македонија покажала недостаток на вистински дијалог и неподготвеност да ги исполни обврските од Европскиот консензус од 2022 година, усвоен едногласно од сите земји-членки на Европската Унија.
„Министерството за надворешни работи на Република Бугарија изразува длабоко разочарување од континуираниот неконструктивен пристап на официјално Скопје и недостатокот на отвореност во комуникацијата со јавноста. Уште еднаш, министерот за надворешни работи и надворешна трговија на Република Северна Македонија зборува за ‘иницијатива на поголеми и повлијателни земји-членки на ЕУ’ за организирање состанок меѓу министрите за надворешни работи на Бугарија и Северна Македонија. Ова не е прв пат Скопје официјално да дава толку нејасни и манипулативни изјави“, се наведува во реакцијата.
Во соопштението се истакнува и дека дијалогот е институционален, дека имплементацијата зависи исклучиво од Скопје и дека од почетокот на мандатот на сегашната влада на Северна Македонија, бугарската страна била отворена за конструктивен дијалог. Наведен е и примерот на одбиената покана за посетата на министерот Муцунски на Софија на 25 ноември 2025 година за одбележување на делото на Свети Климент Охридски, како и спорот околу нацрт-планот за правата на заедниците, кој бил отфрлен од бугарската заедница во Северна Македонија.
Во одговор на денешното соопштение на бугарското МНР, македонското Министерство за надворешни работи изрази жалење што бугарската институција сѐ почесто се позиционира како рецензент на изјави на македонски политички претставници, наместо како партнер во суштински и европски ориентиран дијалог.
Во реакцијата се истакнува дека Северна Македонија нема намера да се меша во внатрешнополитичките или изборните процеси во Бугарија. Дополнително, македонското МНР ги повикува бугарските институции да се водат од принципите на добрососедство, взаемна почит, предвидливост и институционална комуникација – принципи кои претставуваат темелни европски вредности.
„Европа се гради со доверба и резултати, не со етикетирања и политички квалификации. Република Северна Македонија и понатаму останува подготвена за дијалог што ќе се води во духот на европските вредности“, се наведува во реакцијата.
