![Македонските спасувачи пред една година помагаа во спасување по разорниот земјотрес во Турција](https://novina.mk/wp-content/uploads/2024/02/pozarnikari-makedonija-850x560.webp)
Македонските спасувачи пред една година помагаа во спасување по разорниот земјотрес во Турција
Се навршува една година од двојниот разорен земјотрес (М 7.8 и М 7.4 според Рихтеровата скала) кој ја погоди Турција и Сирија. Еден од најмоќните сеизмички шокови кој досега се регистрирани во регионот и пошироко во светот остави околу половина милион луѓе без домови, а милиони ги одбележа со длабоки трауми. Оваа е годишнина од смртта за околу 60 000 луѓе кои исчезнаа под рушевините(во Турција повеќе од 53 000, а во Сирија околу 6000) и повеќе од 125 000 беа повредени.
Речиси во првите часови од земјотресот и првите агенциски вести за јачината и сериозноста на земјотресот, Дирекцијата за заштита и спасување го мобилизира Тимот за брз одговор за урбано пребарување и спасување од рушевини кој во тој момент броеше 40 спасители, и во чиј состав беа 8 пожарникари-спасители од ТППЕ Струмица. После непрекинато патување од околу 30 часа, тимот пристигна во Југоисточниот дел на Турција и веднаш беше распореден во градот Адијаман.
Во крајно тешки услови во кои ги ризикуваа своите животи сите спасители работеа максимално посветени на единствената цел за која се подготвуваат, да спасат човечки животи. На петиот ден од земјотресот, под урнатините на една десеткатница успешно беше спасена жена која останала заглавена во мал животен простор.
Благодарност до сите храбри луѓе од Адијаман кои и покрај огромната болка и загуби кои ги претрпеа постојано беа до нас и ни даваа подршка во нашата работа.