Македонскиот пасош подобро рангиран од БиХ и Албанија
Најновото издание на индексот на пасоши „Хенли“ повторно ги потврдува големите разлики во слободата на патување што ја нудат различните државјанства. Мал број држави овозможуваат лесен пристап до голем број дестинации без виза, што го прави нивниот пасош посакуван на глобално ниво.
На врвот на листата се најдоа главно азиски земји. Сингапур го зазема првото место, со можност за патување без виза во 192 држави и територии. Јапонија и Јужна Кореја го делат второто место со пристап до 188 дестинации.
Третата позиција ја делат пет европски држави – Данска, Луксембург, Шпанија, Шведска и Швајцарија – чиј пасош овозможува влез во 186 земји без виза. Следува исклучително европска група на четвртата позиција, составена од 11 држави со 185 дестинации: Австрија, Белгија, Финска, Франција, Германија, Грција, Ирска, Италија, Холандија и Норвешка.
На петтото место се Унгарија, Португалија, Словачка, Словенија и Обединетите Арапски Емирати со 184 земји. ОАЕ се издвојуваат со најголем раст во последните две децении, откако од 2006 година успеале да додадат 149 нови безвизни дестинации.
Шестата позиција ја делат Хрватска, Чешка, Естонија, Малта, Нов Зеланд и Полска, додека Австралија останува на седмото место заедно со Латвија, Лихтенштајн и Велика Британија. Британскиот пасош бележи најголем пад во рамките на ова издание на индексот, и сега нуди пристап до 182 земји – осум помалку од лани.
На осмото место се Канада, Исланд и Литванија (181 земја), а Малезија е деветта (180 земји). Првата десетка ја комплетираат Соединетите Американски Држави, кои се вратија на 10. позиција со 179 дестинации, откако на крајот од 2025 година испаднаа од групата од првите десет.
На 11. место се рангираат бугарскиот и романскиот пасош со 178 земји без виза.
Кога станува збор за регионот, најдобро рангиран е српскиот пасош, кој е на 34. позиција со пристап до 136 држави. Пасошите на Северна Македонија и Црна Гора заеднички го држат 38. местo со можност за патување во 128 земји. Зад нив се БиХ на 42. место (122 земји) и Албанија на 43. место (121 земја). Турција го дели 46. местo со Русија, со пристап до 113 дестинации.
Најслабо рангиран во регионот е косовскиот пасош на 59. место (81 земја), и се наоѓа заедно со кинескиот и боцванскиот пасош.
На дното на глобалната ранг-листа се државите зафатени со конфликти или политички кризи – Пакистан, Јемен, Ирак и Сирија, додека Авганистан е последен на 101. место со пристап до само 24 дестинации без виза.
