„Македонија влегува во авторитаризам“: Филипче од Брисел бара европска помош и најавува „Фронт за демократија“
Претседателот на опозициската СДСМ, Венко Филипче, преку директно обраќање од Брисел, упати драматичен апел за заштита на демократските процеси во земјата. Реагирајќи на, како што ја нарече, „срамната Резолуција“ изгласана од владејачките ВМРО-ДПМНЕ и ЗНАМ, тој оцени дека власта прави директен обид за замолчување на опозицијата и воведување режим.
Филипче најави дека за оваа состојба ќе побара поддршка од сите прогресивни сили во Европа, предупредувајќи дека потегот на Собранието е удар врз слободата на говорот и политичкото дејствување.
Лидерот на социјалдемократите беше дециден дека носењето на, според него, неуставна резолуција насочена против опозицијата, означува крај на демократијата.
Од срцето на Европската Унија, Филипче најави дипломатска офанзива. Тој истакна дека ќе побара конкретна поддршка за одбрана на демократијата од сестринските социјалистички и социјалдемократски партии, како и од сите демократски сили на континентот.
Во своето обраќање, претседателот на СДСМ повика на масовно обединување, кое би ги надминало партиските рамки.
СДСМ, според него, нема да дозволи гаснење на слободата и останува на браникот на европските вредности на државата.
