Македонец со камион запрен во Швајцарија поради сериозен дефект кој бил опасен за другите учесници во сообраќајот
Кантоналната полиција соопшти дека на 26 март 2025 година, на контролен пункт за тешки возила во Џорнико бил застанат камион кој се движел на север и бил натоварен со доставни возила. Камионот го управувал 36-годишен возач од Северна Македонија.
При деталната техничка контрола било утврдено дека дел од конструкцијата на камионот – метален носач од надградбата – бил искривен поради голема пукнатина во рамката. Пукнатината била широка околу еден сантиметар во горниот дел и половина сантиметар во долниот дел. Исто така, било забележано и прекумерно движење во приклучокот од типот „сферична спојка“, што укажува на нестабилност.
Дополнително, камионот ја надминувал дозволената должина – наместо максимум 20 метри и 35 сантиметри, тој бил долг 20 метри и 54 сантиметри. Бидејќи приколката не ги исполнувала минималните стандарди за стабилност, било наредено таа да се пренесе со друго возило кое е соодветно за транспорт, за да може безбедно да се отстрани од Швајцарија.
Против возачот и сопственикот на камионот се поднесени пријави и им е изречена парична казна поради сериозно прекршување на сообраќајните правила.
