Мајката на Васил сведочеше: Таткото не му дозволувал да вози без дозвола
Со сведочење на сопругата Ана Јованова, денеска во Основниот кривичен суд Скопје продолжи судењето против Зоран Јованов, татко на Васил Јованов, кој е осуден за тешката сообраќајна несреќа во која животот го загуби Фросина Кулакова.
Јованова пред судот изјави дека нејзиниот сопруг никогаш не му дозволил на нивниот син да управува возило без да има положено возачки испит. Таа нагласи дека Васил покажал интерес за возење откако го положил теоретскиот дел, но не успеал да го положи практичниот испит.
Според нејзиното сведочење, синот побарал да вежба со семејниот автомобил, но таткото бил категорично против и инсистирал обуката да се одвива исклучиво со инструктор.
Судењето продолжува на 28 април, кога се предвидени сослушувања на уште четворица сведоци, додека во текот на мај треба да сведочи и Васил Јованов.
Процесот против Зоран Јованов започна во јуни 2025 година. Тој се товари за „загрозување на безбедноста на сообраќајот со опасно дејство или средства“, поради тоа што во јануари 2025 година неговиот син, управувајќи автомобил без возачка дозвола и под дејство на алкохол, удрил во Фросина Кулакова на булеварот „Партизански одреди“, при што таа починала на местото на несреќата.
