Министерство за правда: Утре ќе ги побараме сите списи од судовите поврзани со Груевски, потоа ќе постапиме согласно важечките законски прописи!
Министерството за правда информира дека досега е поднесено едно барање за екстрадиција за поранешниот премиер Никола Груевски, и тоа на 20 ноември 2018 година, кое било дополнето во јуни 2019 година.
Барањето за екстрадиција се однесувало на сите предмети за кои имало сознанија дека се водат постапки пред македонските правосудни органи, односно за сите случаи по кои била распишана потерница.
Од Министерството посочуваат дека Република Унгарија го одбила барањето за екстрадиција на 5 август 2019 година, со образложение дека на Груевски му е одобрен азил, согласно нивното законодавство, кое не дозволува предавање на лице со таков статус на државата од која избегало.
Воедно, Министерството за правда наведува дека континуирано го следи случајот и ги презема сите законски мерки за обезбедување на потребната документација. Во текот на утрешниот ден ќе биде доставено барање до надлежните судови и обвинителства за доставување на сите списи поврзани со предметите против Никола Груевски.
Откако ќе бидат обезбедени потребните документи од надлежните институции, Министерството ќе постапи согласно важечките законски прописи.
