Лукровски: Системот на безбедност мора да функционира доколку сакаме да имаме мирни празнични денови
Во пресрет на претстојните празнични денови, денеска, во просториите на Општина Карпош, се одржа координативен состанок помеѓу полициските службеници од Полициска станица Карпош и претставниците на месните и урбаните заедници. На средбата присуствуваа градоначалникот Сотир Лукровски и Секретарот на општината Мирјана Пехчевска Поп Илиева, како и командирот на ПС Карпош Стефан Тасевски, помошник командирот Милорад Јосифовски, водичот на безбедносен реон Моника Саздова, началникот на ОКР Карпош Давор Дракуловски и помошник началникот Јулијана Станчова. Ова е долгогодишна пракса за одржување на вакви средби на кои се дискутира за активностите кои се преземаат преку целата година, како и за претстојниот празничен месец ,и како граѓаните да се справат со кражби, пријави за пиротехнички материјали и слично.
Првиот човек на Општината, Лукровски посочи дека системот на безбедност е главното нешто кое треба да функционира.
„Би сакал да потенцирам дека овие средби се од големо значење за превземањето на соодветни мерки во зајакнувањето на јавниот ред и мир во Карпош. Системот на безбедност мора да функционира доколку сакаме да имаме мирни празнични денови. Треба да соработуваме со нашите полициски службеници и секако да веруваме во нив“ – рече кратко Лукровски.
Началникот на ПС Карпош, Давор Дракуловски , додаде дека средбите со граѓаните во секоја урбана и месна заедница имаат за цел да обезбедат едукација и превенција од несакани ситуации.
„Би сакал да апелирам до граѓаните и до вас како претставници од УЗ и МЗ, дека е потребно пред се, да се врати довербата во Полицијата. Ние сме тие кои можеме да преземеме мерки и да дејствуваме согласно нашите ингеренции, па затоа бараме поддршка и соработка со сите Вас“ – истакна Дракуловски.
Општина Карпош апелира до сите граѓани, секој сомнителен случај да го пријавуват во урбаните и месните заедници кои имаат обврска навремено да ги контактираат и да соработуваат со полициските службеници.
