Лукаревска: Завршува акцијата за нафтените компании, наскоро детали
Директорката на Управата за јавни приходи, Сања Лукаревска, на денешната средба со медиумите рече дека завршува акцијата која се прави против нафтените компании за затајување на данок, а денеска треба да биде комплетирана проверката со контрола на една бензинска станица во Штип.
– Денеска до полноќ треба да завршиме со попис во уште една бензинска пумпа во Штип. Таму оди малку потешко соработката со даночниот обврзник. Целиот капацитет на регионалната дирекција Штип ќе биде вклучен во спроведувањето на пописот. Станува збор за една посебна мрежа, но станува збор и за три компании добро познати за јавноста и тие се од различни региони на државата. По завршѓување на пописот и по завршување на празниците ќе дадеме посебно известување до медиумите, рече Лукаревска.
Првиот човек на УЈП ја обелодени оваа акција на 6 декември во тв студио, а обелоденувањето на афера со затајување на данок на ланец компании од нафтената индустрија тогаш го најави за две недели.
Таа не кажа дали станува збор за големи компании, но рече дека станува збор за дејност со трговија за горива и дека контролите и анализите ќе завршат во наредниот период. Според Лукаревска, имало обид да се сокрие данок во сметководствената евиденција.
