Лизгање на земјиштето во „Кисела Вода“ – Кризниот штаб на општина Липково бара итна реакција
Кризниот штаб на општина Липково бара итна реакција од надлежните институции поради лизгање на земјиштето во месноста „Кисела Вода“, соопштија денеска од Регионалниот центар за управување со кризи Куманово.
Барањата за увид се упатени до Центарот за управување со кризи, Дирекцијата за заштита и спасување, „Македонија пат“ и полициската станица Матечје.
Кризниот штаб апелира институциите веднаш да излезат на терен и да извршат увид во непосредна близина на мелницата и регионалниот пат кон влезот на село Липково.
Од РЦУК Куманово истакнуваат дека „Македонија пат“ Куманово веќе укажала дека стручни лица од Градежниот факултет треба да го испитаат земјиштето за понатамошно планирање на интервенции и решавање на проблемот во селото.
