СДСМ: Вториот вработен во фирмата со тендри од 9 милиони евра поврзан со УБК на Мијалков и уништувањето на опремата за прислушување
На денешната прес-конференција, портпаролката на СДСМ, Богданка Кузеска, објави детали за сомнителни тендерски шеми поврзани со владејачката гарнитура на Христијан Мицкоски.
Според Кузеска, вториот вработен во фирмата која во само шест месеци добила тендери вредни речиси 9 милиони евра е Глигор Поцев. Тој, како што истакна портпаролката, бил сведок во случајот „Тврдина“ за уништување на опремата за масовно прислушување како вработен во УБК во периодот на Сашо Мијалков.
Последниот договор на фирмата со Владата се однесува на рамковна спогодба за софтверски лиценци за виртуелна платформа. СДСМ поставува прашања како лица кои биле дел од разузнавачки структури, директно или индиректно поврзани со уништување на опремата за прислушување, повторно се вмешани во милионски тендери.
„Скандалот со тендери вредни 9 милиони евра, доделени на фирма основана пред само една година, покажува дека кај Христијан Мицкоски владее истата криминална школа како кај Никола Груевски и Сашо Мијалков. Методите се исти – милионски тендери платени од пари на граѓаните за фирми со сомнителна историја“, рече Кузеска.
Таа нагласи дека крадењето мора да запре, а институциите мора да преземат мерки согласно законот. „Предупредуваме дека овие дела не застаруваат. Одговорност мора да има и ќе има, кога-тогаш“, додаде портпаролката.
СДСМ истакна дека разоткривањето на ваквите тендерски шеми продолжува и дека истрагата сè уште не е завршена.
