ЛИСТАТА ЌЕ ВЕ ИЗНЕНАДИ: Ова се најплатените професии во Германија
Според проценките на Меѓународниот монетарен фонд(ММФ) од април, Германија е меѓу 20-те најбогати земји со БДП по глава на жител од 55.911 долари, или 47.206 евра, објавува Инвестор.
Германија е исто така најпосакувана дестинација за мигрантите во ЕУ, како од земјите-членки, така и надвор од Унијата, според податоците на Евростат. Меѓу нив има многу високообразовани работници кои бараат добро платени работни места.
Но, кои се најплатените работни места во Германија и какви се просечните годишни плати за овие позиции?
Авијацијата, здравството и правдата се меѓу врвните сектори
Според податоците од Федералниот завод за статистика (Дестатис) од април 2024 година, воздухопловниот сектор е најплатениот во Германија – со просечна годишна бруто плата од дури 336.000 евра. Платите во оваа област обично почнуваат од 132.000 евра.
Здравството е на второ место – просечната годишна заработка се движи помеѓу 108.000 и 156.000 евра, додека правниот и судскиот сектор нудат плати во опсег од 84.000 до 144.000 евра.
Во академскиот и истражувачки сектор, платите се движат помеѓу 72.000 и 120.000 евра, а во ИТ и инженерскиот сектор помеѓу 72.000 и 114.000 евра. Вработените во јавната администрација се исто така релативно добро платени – од 60.000 до 114.000 евра годишно.
Од друга страна, малопродажниот и услужниот сектор се на дното на листата, со просечни годишни плати помеѓу 30.000 и 42.000 евра.
Пилотите ја водат листата на најплатени професии, со просечна плата од 342.072 евра годишно. Инструкторите за летање во сложени улоги заработуваат околу 281.592 евра, додека контролорите на летање, пилотите на патнички авиони и техничарите во сложени воздухопловни операции се исто така високо позиционирани на листата.
Менаџерите во областа на хуманата медицина и стоматологијата заработуваат 165.576 евра годишно, додека специјалистите за лаборатории и радиологија во сложени улоги заработуваат помеѓу 129.000 и 131.000 евра. Хирурзите и општите лекари во сложени улоги се исто така високо на листата, со годишни плати над 100.000 евра.
Менаџерите во правните услуги имаат средна плата од 149.280 евра, додека судиите, обвинителите и адвокатите во сложени случаи заработуваат околу 95.000 евра.
Меѓу првите 50 занимања се и менаџери од академијата, истражувањето, ИТ секторот, државната администрација, развојот на софтвер, сметководството, деловната организација и медиумите – речиси сите со плати над 100.000 евра.
Неочекувано, магионичарите и илузионистите се на осмото место, со неверојатен годишен приход од 134.316 евра.
foto Irina Shatilova/Shutterstock
/faktor.mk
