Ленче Ристоска бара извинување од Мицкоски за „медиокритетите“, Владата прашува – зошто се препозна?
Острите зборови на премиерот Христијан Мицкоски за состојбите во правосудството предизвикаа директна реакција од обвинителката Ленче Ристоска. Таа официјално побара јавно извинување од претседателот на Владата, сметајќи дека неговите квалификации за „медиокритети“ во фелата биле упатени лично кон неа.
Ристоска не застана само на јавна реакција, туку за случајот го известила и Советот на јавните обвинители, поднесувајќи претставка која ова тело ќе треба да ја разгледа и да утврди дали има основа за нејзините наводи.
Поводот за конфликтот е неодамнешното интервју на премиерот, во кое тој упати остри критики кон дел од судско-обвинителската фела, користејќи го терминот „медиокритети“. Иако не посочи конкретни имиња, поранешната обвинителка на СЈО се препозна во описот и оцени дека станува збор за директна навреда врз нејзиниот професионален интегритет.
Од „Илинденска“ бр. 2 експресно одговорија на барањето за извинување, но со доза на иронија. Од Владата потенцираат дека премиерот во ниту еден момент не го спомнал името на Ленче Ристоска.
Тензијата помеѓу Ристоска и актуелната власт не е нова.
Ристоска беше едно од заштитните лица на поранешното Специјално јавно обвинителство (СЈО) и директно ги застапуваше предметите против тогашните функционери на ВМРО-ДПМНЕ, вклучително и случајот „Талир“ (за незаконско финансирање на партијата).
Судирот се продлабочи неодамна, откако Владата ја поништи листата со кандидати за судија во Европскиот суд за човекови права во Стразбур. Ристоска котираше високо на оваа листа, а поништувањето беше протолкувано како политичка пресметка.
