Лекарите без граници изгубија контакт со персоналот во Газа
Организацијата Лекари без граници денеска објави, по извештаите за силно гранатирање во близина на медицинскиот комплекс Ал-Шифа во Појасот Газа, дека изгубила контакт со персоналот ангажиран во таа здравствена установа.
„Во текот на последните неколку часа драматично се интензивираа нападите врз болницата Ал-Шифа. Персоналот на Лекари без граници во таа болница пријавил катастрофална состојба во болничкиот комплекс“, соопшти хуманитарната организација на платформата Х во 03:43 часот утринава по локално време.
Во соопштението се изразува екстремна загриженост за безбедноста на персоналот и пациентите во болницата Ал-Шифа, од кои некои се во критична состојба и не можат да се движат или да се евакуираат, пренесува Си-Ен-Ен.
„Има пациенти на кои им е потребна операција. Има пациенти кои лежат и се лекуваат во нашето одделение. Не можеме да ги евакуираме и да ги оставиме овие луѓе внатре. Како лекар, се колнам дека ќе им помогнам на луѓето на кои им е потребна помош“, рече д-р Мохамед Обеид, хирург во болницата Ал-Шифа.
Комуникациите внатре во Газа беа наизменично нарушени откако израелската воена кампања започна минатиот месец по нападот на Хамас, Израелците тврдат дека болницата Ал Шифа била користена како штит за воената инфраструктура на Хамас, што палестинската милитантна организација го негира.
