ЛАЖЕЛ ДЕКА БЕГА ОД ВОЈНАТА ВО КОСОВО, A ДОШОЛ ОД АЛБАНИЈА: Човек кој илегално влегол во Британија, стана амбасадор

Дошол илегално во државата, а сега стана амбасадор на Албанија во Британија. Станува збор за Уран Феризи, кој илегално влегол во земјата во 1998 година, тврдејќи дека е од Косово и дека бега од војната, пишува „Дејли Мејл“. Тој никогаш не работел во дипломатската служба, но албанската влада го предложила за амбасадор во јуни годинава. Амбасадорот има 42 години. 

Повеќе извори потврдиле дека Феризи со камион допатувал во Британија како илегален мигрант, без никакви документи за идентификација, по што му е дозволено да остане во земјата додека се разгледува неговиот случај.

Меѓутоа, во мај 2000 година се оженил со Британката, Сара Ленон, врз основа на што добил дозвола да престојува во државата на неопределено време. 

Во биографијата пишува дека е математичар и информатичар кој студирал на Универзитетот Оксфорд, а во периодот од 2006 до 2008 година бил финансиски аналитичар, по што се преселил во САД каде работи како научен истражувач на Универзитетот во Њујорк и Стенфорд.

Поранешната министерка за надворешни работи на Албанија, Едит Харџи, рече дека „не е дипломатски, морално или етички правилно некој што влегол нелегално во Обединетото кралство да биде назначен за амбасадор“.

Илјадници Албанци за една деценија илегално влегоа во Обединетото Кралство, со камиони и со мали чамци преку Ла Манш. Дури имаше и повици од британските политичари со албанскиот премиер Еди Рама да се погрижи луѓето да не влегуваат илегално во Британија.