КУРТИ: Вучиќ во координација со Русија подготвува нови закани
Koсовскиот премиер Албин Курти вели дека српскиот претседател Александар Вучиќ во координација со Русија подготвува нови закани кон Косово.
Но, додава дека не се плашат.
„Пристапот на Владата во Србија кон Косово е многу депресивен. Првично, неказнивоста и пропагандните кампањи беа нормализирани. Сега тие имаат за цел да ги нормализираат паравоените и терористичките напади (Бањска, 24 септември 2023 година), заканите и ултиматумите, кои се оправдуваат со лажни вести и кампањи за дезинформации, пред очите на демократскиот свет“, напиша Курти.
Косовскиот премиер порача дека Косово е посилно од кога било досега.
Распишување локални избори на северот на Косово, враќање на Србите во косовската полиција и судство и повлекување на специјалните полициски сили на Косово се меѓу клучните барања на официјален Белград, кои ги презентираше претседателот на Србија, Александар Вучиќ на 13 септември.
Исполнувањето на барањата е, според позицијата на Србија, „неопходен предуслов за значаен напредок“ во процесот на дијалог меѓу Белград и Приштина.
Вучиќ најави дека Белград ќе започне „глобална дипломатска кампања“ за да ги исполни барањата.
