Кумановските печалбари од Ирак и Авганистан на протест против ретроактивната наплата на УЈП
Околу 4.000 граѓани од Куманово кои работеле во американски бази во Ирак и Авганистан, денеска одржаа мирен протест на градскиот плоштад. Тие побараа од Управата за јавни приходи да ги ревидира известувањата за плаќање персонален данок на доход кои се однесуваат на периодот од 2020 година наваму.
Учесниците на протестот истакнаа дека не се против плаќањето даноци, но се соочуваат со неколку сериозни проблеми. Првенствено, тие посочуваат дека станува збор за двојно оданочување бидејќи даноците се веќе платени во матичните земји на компаниите. Дополнително, УЈП ги товари за период во кој многумина од нив биле надвор од државата повеќе од 183 дена, што законски ги ослободува од одредени давачки, но МВР одбива да им издаде официјални потврди за престојот во странство.
Печалбарите апелираат до Министерството за финансии и УЈП да ја стопираат акцијата и да овозможат разумен рок за прибирање и превод на документацијата од странските компании. Тие нагласија дека парите се легално спечалени и вложени во македонската економија преку недвижности и бизниси, за што веќе се платени сите тековни даноци и придонеси. Од протестот беше порачано дека ќе се бара дијалог со институциите и ќе се користат сите правни механизми за решавање на состојбата.
