„Крстов Дол“ го подели СДСМ: Партијата бара референдум, градоначалникот Митовски бара анализи
Најавениот проект за ископ на антимон во рудникот „Крстов Дол“, во близина на Крива Паланка, иако сè уште е во рана фаза, веќе предизвикува силни реакции во јавноста и политичката сцена. Освен судирите меѓу власта и опозицијата, несогласувања се појавија и во рамки на опозициската СДСМ.
Партијата јавно реагираше на ставот на градоначалникот на Крива Паланка, Сашко Митовски, повикувајќи го да распише референдум за рудникот, наместо, како што наведуваат, да води разговори со премиерот Христијан Мицкоски. Во меѓувреме, лидерот на СДСМ, Венко Филипче, истакна дека опозицијата не е против инвестиции, туку против проекти кои би можеле да го загрозат здравјето на граѓаните.
Дополнителни тензии создаде и ставот на самиот градоначалник, кој се дистанцираше од партиската линија. Митовски смета дека одлуката за проектот не треба да се носи избрзано преку референдум, туку по детална и сеопфатна анализа.
„Мојата обврска е двојна: да го заштитам здравјето и безбедноста на граѓаните, но и да придонесам за економски развој, нови инвестиции и отворање работни места“, изјави Митовски. Тој нагласи дека вакви инвестиции би биле прифатливи само доколку се исполнат строги услови за заштита на животната средина, вклучително и затворен производствен процес без штетни емисии и обезбедени финансиски гаранции за евентуални последици.
Во изминатите денови, различни засегнати страни ги изнесоа своите ставови, загрижености и аргументи околу потенцијалната реализација на оваа инвестиција, која се разгледува во соработка со САД. Засега, проектот се наоѓа во фаза на истражување, која се очекува да трае од една до две години.
