Крстевска: Многу е чудно како обвинетиот Палевски дошол до записниците од испитувањето на останатите обвинети
Обвинителството презело доволно дејствија и сите наводи на обвинетиот Љупчо Палевски Палчо се неосновани, изјави јавната обвинителка Жаклина Крстевска. Според Крстевска, обвинетиот ја искористил можноста за поднесување барање за изземање за да ги изнесе своите наводи кои начелно му одат во поткрепа на неговата одбрана.
„Доказите се веќе приложени во списите од предметот и преку презентирање на видео записи ќе ја приближиме јавноста до конкретните дејствија што ги презел обвинетиот, кој цело време негираше учество во настаните“, рече Крстевска одговарајќи на новинарски прашања по завршувањето на денешното рочиште пред Основниот кривичен суд во Скопје.
Обвинителката ја демантираше и тврдењето на обвинетиот Палевски дека неговиот сообвинет Боре Видевски поседувал нелегално оружје. Крстевска истакна дека обвинителството располага со сите потребни докази, кои се приложени во списокот на докази.
„Сите дејствија се преземени од страна на обвинителството. Во врска со изјавата на адвокатот на Палевски дека другите обвинети преговарале со обвинителството, тоа не е точно. Ниту еден бранител не разговарал со обвинителството надвор од службените дејствија“, додаде Крстевска.
Таа исто така изрази сомнеж за тоа како обвинетиот Палевски добил записници од испитувањето на останатите обвинети, кои, според неа, не би требало да бидат во негова сопственост, бидејќи тие документи се за исклучиво користење на обвинителството.
„Многу е чудно како обвинетиот Палевски дошол до овие записи, бидејќи тие се списи само за обвинителството и не се доставени на увид на одбраната“, истакна Крстевска.
Во однос на прашањето дали ќе се истражи кој од обвинителството му ги дал овие записи, Крстевска посочи дека не можат да се изнесат конкретни детали додека не се преземат конкретни дејствија за истото лице.
„Доколку имаме докази, ќе се произнесеме“, заклучи Крстевска.
Првообвинетиот за двојното убиство на Вања Ѓорчевска и Панче Жежовски, Љупчо Палевски Палчо, на почетокот на денешното рочиште побара изземање на јавната обвинителка Жаклина Крстевска и целото ОЈО Скопје поради несоодветно спроведена истрага. Судијата Ивица Стефановски го одложи судењето за 3 февруари, напоменувајќи дека ќе се чека одлуката на Републичкиот јавен обвинител Љупчо Коцевски по барањето за изземање.
