„КРШЕВ ЅИД СО ГОЛИ РАЦЕ ЗА ДА ИМ ДАДАМ ВОЗДУХ“: Габриела Наунова сведочеше како полицаец одбил да ѝ помогне за ќерка ѝ
„Побарав помош од службените лица, полицајците кои стоеја околу мене. Еден од нив се сврти и ми рече: ’Јас не сум обучен за тоа‘.“
Оваа скандалозна реченица ја слушнала мајката Габриела Наунова додека во рацете ја држела својата ќерка Надица, очајно барајќи спас пред дискотеката „Пулс“.
Кршење на ѕидот со голи раце
Наунова го потврди сведочењето на претходната мајка (Ирена), раскажувајќи како се обидела физички да го сруши ѕидот кај женските тоалети, од каде се слушале крици. „Слушав викотници од левата страна, од кај женските вециња… Девојчиња се држеа на шипката и викаа: ’Дајте ни воздух!‘. Почнав да кршам со раце за да направам дупка да им влегува воздух. Како што кршев, некој ми подаде девојче, цело исцрнето, но живо,“ раскажа Габриела.
„Второто девојче што ми го подадоа беше мојата ќерка“
Најтешкиот момент следел веднаш потоа. Сопругот на Габриела влегол во самиот влез и ја извлекол нивната ќерка. „Второто девојче што ми го подадоа – тоа беше мојата ќерка. Очите ѝ беа отворени, мислев дека е само онесвестена. Почнав да ја шлакам со вода, но немаше реакција,“ сведочеше мајката низ солзи.
Токму во тој момент, кога барала помош од полицијата за реанимација или транспорт, го добила одговорот дека „не се обучени“. На крајот, Жарко (сопругот на сега починатата Моника) притрчал и им помогнал да ја однесат Надица во болница со неговото возило.
„Ја однесовме во болница, и таму една медициснка сестра излезе и ни рече дека на Надица и го вратиле пулсот. Веднаш отидов до таа соба имаше еден прозорец каде се гледаше Надица. Кога видов дека детете ми леже само на креветот, без никој околу неа. Мислев дека е кошмар и дека ќе се разбудам, мислем дека е сон. Дека тоа што ми се случува не е вистина, на никој не посакувам да си го виде своето дете мртов, на еден таков начин да има изгореница, да има мала трага на било што. Беше чиста како солза, уште парфемот ѝ мирисаше“, сведочеше Наунова.
