„Мајка со голи раце го кршеше ѕидот за да влезе, а полицијата и синот на газдата само гледаа“
„Видов мајка како со голи раце го крши ѕидот за да влезе и да си го спаси детето. Тоа беше Габриела Наумова, мајката на Надица. Бараше помош да го скрши ѕидот бидејќи вратата беше претесна, но никој не ѝ помогна. Таа беше сама.“
Ова е најпотресната слика што пред судот ја пренесе Ирена Минова, која пристигнала пред „Пулс“ околу 02:50 часот. Таа сведочеше за очајот на родителите кои биле оставени сами на себе.
Минова упати директно и тешко обвинување кон полициски службеник и синот на сопственикот на дискотеката. Таа тврди дека слушнала група деца како бараат помош од прозорец со решетки на левата страна.
„Побараа помош од службеното лице Драган Петрушев… Таму го видов и Михајло, синот на газдата, како седи, а до него стоеше и полицаецот. Децата извикуваа и бараа спас, а тие стоеја и гледаа. Кога почна да паѓа и пука нешто, тие се повлекоа назад,“ рече Минова.
Мајката ја оспори одбраната на обезбедувањето и персоналот дека биле херои. „На вратата го видов обезбедувањето Лазар. Ги прифаќаше децата што излегуваа, но не видов дека некој влегува внатре да помага. Ако е точно дека сите спасувале, сега немаше да има ниту една жртва. Помагаа само оние што сега се веќе починати, бидејќи таму немаше простор да влезеш и излезеш жив,“ децидна беше таа.
Минова откри дека нејзиниот син (братот на Драгана) бил надвор за време на пожарот бидејќи претходно полицијата направила контрола, ги легитимирала и ги изнела малолетниците надвор. „Синот мислел дека е тепачка, па сфатил дека е пожар. Сакал да се врати по сестра му, но не успеал,“ раскажа мајката, додавајќи дека Драгана, за жал, останала внатре.
