„Знаеа за рации, а градоначалникот беше чест гостин“
„Како вие не се чувствувате виновни? Вие секогаш ќе бидете убијци на нашите деца во нашите очи!“
Со овие зборови, Габриела Наунова се сврте директно кон обвинителната клупа, предизвикувајќи громогласен аплауз од родителите во публика, што е реткост во судница. Таа ги обвини функционерите за лицемерие, тврдејќи дека токму тие што требало да го затворат клубот, биле негови редовни гости.
„Мајката го демантираше тврдењето дека институциите не знаеле за „Пулс“. „Кога ги гледам инспекторите, градоначалниците, полицајците кои беа гости во дискотеката… Има слики и докази дека градоначалникот Ратко (Димитровски) бил присутен на отворањето и бил чест гостин таму. Никогаш не сме помислиле дека работи нелегално кога ги гледаме нив таму,“ рече таа.
Наунова изнесе сериозно тврдење за протекување информации од полицијата кон сопствениците. Таа сведочеше за разговор што лично го слушнала во кафулето „Класик“. „Михајло (синот на газдата) во мое присуство ја прашуваше Кристина: ’Дали ќе има вечер рација?‘. И таа му одговараше. Јас тоа лично го слушнав,“ тврди мајката, сугерирајќи дека дискотеката однапред знаела кога ќе има контроли.
Таа додаде дека дури по трагедијата сфатиле оти „Пулс“ бил место за „црни работи“, а не само за забава. „Бидејќи беше единствена дискотека во Кочани, таму излегуваа многумина кои сега седат на овие столчиња,“ заклучи Наунова, алудирајќи на поврзаноста на локалната елита со објектот.
