Криминалитетот во пад кај возрасните, расте бројот на осудени деца
Во текот на 2024 година во Северна Македонија биле регистрирани 18.832 пријавени полнолетни сторители на кривични дела, од кои 6.755 биле осудени, покажуваат податоците на Државниот завод за статистика. Кај децата, биле пријавени 486 сторители, а 300 од нив завршиле со осудителни пресуди.
Статистиката се базира на редовни истражувања што се спроведуваат преку податоци доставени од основните јавни обвинителства и судовите, и ги опфаќа пријавените, обвинетите и осудените сторители на кривични дела, како полнолетни лица, така и деца.
Анализата на податоците од 2023 година покажува продолжување на трендот на намалување на криминалитетот кај возрасните. Во споредба со 2022 година, бројот на пријавени полнолетни сторители е намален за 6,9 проценти, бројот на обвинетите за 15,8 проценти, а бројот на осудените за 16 проценти.
Кај децата, пак, иако бројот на пријавени сторители е намален за 8,5 проценти, бројот на осудените е зголемен за 17,2 проценти. Овој податок, според статистиката, укажува на поефикасно процесирање на случаите поврзани со малолетни сторители.
Податоците покажуваат дека криминалитетот во земјата бележи благо намалување кај возрасната популација, но растот на осудени деца ја нагласува потребата од засилени превентивни мерки, како и програми за социјализација и реинтеграција на малолетните сторители.
Податоците за 2025 година сè уште не се објавени.
