Ковачевски убеден: Пратениците ќе ги поддржат уставните измени
Уставните измени ќе влезат во Собранието тогаш кога ќе биде оценето од страна на Владата. Овој процес нема да застане и ќе оди во парламентарна процедура. Убеден сум дека македонските пратеници, независно од која партија доаѓаат, ќе ја донесат одлуката која обезбедува европска иднина на граѓаните, рече денеска премиерот Димитар Ковачевски.
Според него, најдобро е уставните измени да се донесат со поддршка на сите политички партии.
Како што објасни Ковачевски, најпрво ќе биде одржана владина седница на која детално ќе се разгледа предлогот доставен од Работната група и од Министерството за правда, а потоа ќе почне процесот во Собранието.
-Ова не е процес на еден човек, на една по партија или на една влада, туку широк општествен процес со кој се обезбедува европска иднина за државата и граѓаните. Овој процес не може да биде заложник на политичка кариера на еден човек. Политичар може да реши да ја зароби својата партија, да бара нотарски изјави, па потоа тие да не важат, да бара потпишувања, но не може да зароби цела држава и иднина на цели генерации. Ако ние овие одлуки ги донесевме пред 25 години и ако спорот со Грција беше решен пред 25 години, земјава денес ќе беше заедно со Хрватска, членка на ЕУ, дел од шенген зоната и држава во која валута е еврото. Поради неносење одлуки поради немање храброст, денеска сме во ситуација се уште да решаваме прашања од минатото. Нам ни се потребни политичари кои носат решенија за иднината, а не политичари кои постојано зборуваат за минатото. Решенијата се денес за иднината. Секое неносење одлука денес, значи изгубени нови 20 години утре, подвлече Ковачевски.
Тој потенцира дека донесувањето на уставбните измени е процес што не треба да се избрзува, но треба да се направи брзо.
-Ни треба брз, но не избрзан процес, ни треба атмосфера која ќе биде конструктивна. Атмосферата и станува поконструктивна, обвинувањатаа за бугарзицаија, асимилација, за губење на македонскиот јазик и идентитет се веќе демантирани. Сите обвинувања на Левица поддржана од ВМРО-ДПМНЕ паднаа во вода, нагласи Ковачевски, уште еднаш потсетувајќи дека земјава ги почна преговорите на 19 јули со македонски јазик.
Во врска со изјавата на холандскиот амбасадор Дирк Јан Коп за уставните измени, премиерот истакна дека и самиот тој постојано кажува дека процесот на ЕУ интегрирање значи носење голем број реформи.
-Амбасадорот Коп секогаш има исклучително директни изјави кои не се во спроитвност со тоа што јас го кажувам. Процесот на ЕУ интегрирање значи носење голем број реформи и ова не е првото, ниту последното гласање со двотретинско мнозинство за полноправно членство во ЕУ. Пред нас е добивањето на извештаите од скринигн процесот и јас со нетрпение го очекувам зашто таму ќе се покажат аномалиите на голем дел од институциите, начинот на функцонирањето и спроведувањето на законодавството во државата, рече Ковачевски.
