Ковачевски ќе си поднесе оставка 100 дена пред избори, на негово место доаѓа Џафери!
Премиерот Димитар Ковачевски денеска истакна дека техничката Влада е законска обврска, и за изборите во земјава ќе има техничка Влада, затоа што, како што вели, законите се тука да се почитуваат.
„Ние ако зборуваме за владеење на право тогаш не може да велиме еден закон ќе се почитува, а друг закон нема да се почитува или овој закон ќе се почитува така како што е напишан, а овој ќе се почитува на некој друг начин. Моја законска обврска е на 100 дена пред одржување на изборите како претседател на Влада да поднесам оставка и јас тоа ќе го направам во законскиот рок, а обврска на политичките партии согласно закон е да делегираат свои претставници во таа техничка Влада што ќе ги спроведе изборите“, вели Ковачевски.
Тој додава дека процесот е многу јасен и во текот на наредниот период ќе бидат направени сите законски процедури.
На местото на Ковачевски, во техничката влада, ќе застане актуелниот претседател на Собранието и наскоро прв премиер Албанец, Талат Џафери.
