Кочоска за навредите кон Петровска: Жалам што имаше таков дефокус, кога би погрешила би се извинила!
Во изјава за медиуми на новинарско прашање поврзано со навредите спрема Славјанка Петровска од СДСМ, министерката за финансии Гордана Димитриеска-Кочоска изјави дека за неа веќе е затворено тоа прашање.
-Жалам што имаше таков дефокус во однос на тоа што јас го кажав од говорницата и како беше интерпретирано. Мислам дека неколку пати повикав на тоа луѓето да ја ислушаат целата комуникација во Собрание и самите да носат заклучоци. Во однос на извинувањето мислам дека својот став го кажав, кога би погрешила би се извинила. Воопшто немало тенденциозност ниту некаква намера, рече Димитриеска – Кочоска.
Министерката вели дека на седницата зборувала за трошоците на живот и врз основа на тоа не би сакала да коментира понатаму на таа тема.
-За мене како што кажав, тоа е затворено, но би замолила една работа. Граѓаните да бидат стрпливи, да почекаат малку. Времето ќе покаже кој бил во право, а кој не бил и зошто се случуваше сето ова. Оставете на времето, ве молам. За многу скоро ќе ви биде јасно на сите зошто се случуваа сите овие работи, рече министерката за финансии Димитриеска – Кочоска.
Инаку министерката за финансии Димитриеска-Кочоска и деканот на Економскиот факултет Предраг Трпески потпишаа Меморанудм за соработка помеѓу Министерството за финансии и Економскиот факултет.
