Кој се ќе го гланца МВР три години за 6 милиони евра?
Четири скопски компании специјализирани за одржување хигиена го поделија тендерот за чистење на неколку илјади квадратри метри површини во дирекцијата на МВР како и во неговите три регионални центри во Скопје, СВР Скопје, посебна организациска единица на БЈБ и уште шест регионални центри во Македонија
Министерството за внатрешни работи (МВР) е најголемата организациска единица според број на вработени и локациска поставеност во конкуренција на сите други ресори на државната управа. Во него работат повеќе од 13.000 лица организирани во Министерство што има 11 регионални центри од кои 4 се во Скопје и уште 7 се ширум Македонија. МВР се грижи за јавната безбедност на сите граѓани, за редот и мирот во најширока смисла на зборот, но и за ред во целиот патен сообраќај во кој учествуваат повеќе од 700.000 регистрирани возила.
Додека МВР се грижи за да спиеме мирно и да се возиме безбедно некој мора и да се грижи за хигиената во сите објекти на најголемото македонско министерство кое опфаќа 11 регионални центри, дирекција во центарот на Скопје и у ште една посебна организациска единица на силите на МВР и на Бирото за јавна безбедност.
За одржување на хигиената МВР распиша тендер, а неодамна склучи и договори со четири компании специјализирани за одржување на хигиена. Тендерот вреден вкупно 6 милиони евра (со вклучен ДДВ) вклучува секојдневно, неделно, месечно и квартално чистење на регионалните центри во Скопје, Штип, Охрид, Тетово, Струмица, Битола и во Велес.
Според официјални податоци достапни на веб страницата на Бирото за јавни набавки најголемо е учеството во тендерот на дирекцијата на Министерството за внатрешни работи. За негово чисење и одржување на хигиената за идните три години скопската фирма „Ланд Сервис треба да наплати до 2 милиони евра што претставува една третина од сите пари предвидени за чистење.
Речиси милион евра за три години за чистење на посебните организациски единици на МВР и БЈБ (бирото за јавна безбедност) треба да наплати „Ланд сервис“, поточно рамковната спогодба е склучена на износ до 975.000 евра.
„Ланд сервис“ го доби и тендерот за полицискиот регионален центар СВР Штип кој три години ќе го чисти за 481.000 евра. Истата компанија ќе ги чисти и просториите на скопскиот Регионален центар Исток за 120.000 евра за три години.
Според ова скопски „Ланд сервис“ од тендерот ќе добие до 3,62 милиони евра.
Компанијата „Серта“ од Скопје ќе ја одржува хигиената во скопските регионални центри „Запад“ и „Север“ за вкупен износ до 587.000 евра.
„Бапал“ ги доби тендерите за регионалните центри во Битола, Велес и во Струмица за вкупен износ до 1,015 милиони евра.
За чистотата во СВР Тетово и СВР Охрид ќе се грижи скопската компанија „Сити Аутсорсинг“ за вкупен износ кој според рамковната спогодба не може да надмине 818.000 евра.
Р.Ф.
