Китановска: Обвинителството го чека „ѓаволски тешка работа“ за да ги докаже претпоставките
Во судскиот процес за една од најголемите трагедии во државата, пред судот се обрати и Маријана Китановска, претставник по службена должност на обвинетото правно лице „РУБИКОН СЕКЈУРИТИ СОЛУШНС“. Таа упати сочувство до семејствата на загинатите, но испрати јасна порака до Обвинителството дека патот до докажување на вината ќе биде исклучително тежок.
Китановска истакна дека целосно се согласува со претходно изнесените воведни говори на бранителите и нагласи дека одбраната ќе инсистира на строго почитување на Законот за кривична постапка.
Според претставничката на правното лице, товарот на докажувањето паѓа врз обвинителството, кое според неа, се соочува со сериозен предизвик поради начинот на кој е напишан обвинителниот акт.
„Со оглед на начинот на кој е напишано обвинението и доказите содржани во него, на Обвинителството му претстои ѓаволски тешка работа. Бараме судот да донесе пресуда базирана исклучиво на докази и факти, а сè што е индиција и претпоставка да остане надвор од вратите на судницата“, изјави Китановска.
Китановска потенцираше дека одлуката на судот во овој случај ќе има далекусежни последици не само за вклучените страни, туку и за идното постапување на многу физички и правни лица, како и на државните органи во земјата.
„Пред овој суд е задачата да донесе одлука за еден од најтрагичните настани во нашата држава. Очекуваме пресуда која ќе генерира правда, правна сигурност и ќе ја врати довербата во македонското правосудство“, заклучи таа во своето излагање.
