Китанов пушташе автопати, сега ќе продава електрична енергија
Зоран Китанов, поранешниот директор на Јавното претпријатие за државни патишта, наскоро почнува со изградба на фотонапонски централи. На крајот од минатата година негоавата компанија „К-Пауер“, регистрирана во 2021 година, до Регулаторната комисиај за енергетика поднела барање за одобрување лиценца за три фотоцентрали со моќност поголема од 8 мегавати, кои ќе се градат во Рибарци, Општина Росоман.
„К-Пауер“ на Китанов досега се декларираше како специјализирана компанија за проектирање, изградба и одржување на фотоволтаични системи за производство на електрична енергија и како официјален застапник за Македонија на турскиот бренд за фотоволтаици Elin.
Покрај проектирање, инсталација и монтажа на фотоволтаици и други соларни системи, отсега неговата фирма ќе се занимава и со производство на електрична енергија. Китанов не сакаше да даде официјална изјава за „Фактор“, но рече дека изградбата на фотоцентралите ќе почне за една недела, дека опремата е на пат и дека за неколку месеци очекува да почне производството.
Додаде дека средствата за оваа голема инвестиција ги обезбедил во договор за кредитирање со банка и во партнерство со други лица, како и тоа дека иако првично барањето е за производство на електрична енергија од 8,3 мегавати, засега планот останува на 5 мегавати.
Китанов беше директор на Јавното претпријатие за државни патишта од 2017 до 2020, кога беше заменет со актуелниот раководител Ејуп Рустеми и во негово време во употреба беа пуштени автопатите Смоквица – Демир Капија и Миладиновци – Штип. Пред да биде назначен за директор на ЈПДП, од 2011 го водеше локалното јавно претпријатие „Струмица-Гас“ во спроведувањето на гасификацијата на град Струмица и на оранжериите.
Китанов ќе биде владин претставник во Одборот на директори на Телеком се до одржувањето на Собрание на акционери на компанијата, кое ќе се одржи на 30-ти мај, а оставката, како што вели ја поднесува поради тоа што сака да се посвети на новиот бизнис потфат. На негово место во Одборот на директори ќе членува адвокатот Игор Милев.
А.К.
