Камчев на „црна листа“ – санкциите влијаат и на оние кои имаат бизниси со него
Бизнисменот Орце Камчев заврши на „црната листа“ на САД.
Според „Канцеларијата за контрола на странски средства на Министерството за финансии на САД (OFAC) , Камчев ја злоупотребил својата позиција, ангажирајќи се во коруптивни активности и спроведувајќи себична агенда на сметка на демократските институции и граѓаните на Северна Македонија“, рече Брајан Нелсон, потсекретарот за тероризам и финансиско разузнавање во Министерството за финансии на САД.
Тој нагласи дека „министерството останува посветено на повикување на одговорност на сторителите на корупција“.
Во официјалното соопштение американското Министерство го наведува и кривичното досие на Камчев кое според САД трае од почетокот на милениумот. Бизнисменот Јордан „Орце“ Камчев (Камчев) интензивно се занимава со корупција, вклучително и злоупотреба на службената положба, перење пари и други прекршоци повеќе од една деценија, почнувајќи од раните 2000-ти години, наведено е во официјалното известување.
-Во 2022-ра година, Камчев беше осуден во судскиот процес „Парцели на Водно“ за учество во шема за перење пари поврзана со незаконско купување земјиште. Во одвоено судење, Камчев се изјасни за виновен за тешка злоупотреба на службената положба во „Случајот Империја“, во кој беше осомничен за злосторничко здружување, измама, перење пари и други кривични дела поврзани со неговите бизниси, стои во соопштението на американското министерство за финансии.САД не го „забораваат“ ниту неговото учество во случајот Рекет. Камчев од Вашингтон е посочен за тоа што „после скандалот СЈО пропадна. Како резултат на тоа, многу случаи на корупција на високо ниво кои СЈО ги истражуваше, остануваат нерешени и стагнираат, (а на тој начин) се одложува одговорноста за многу поединци кои се занимавале со корупција слична на Камчев“, се вели во твитот на амбасадорката на САД во Македонија, Анџела Агелер.
Таа додава дека овие санкции не влијаат само врз поседувањата и имотот Камчев, туку и врз оние кои имаат бизнис со него.
„САД ќе продолжат да таргетираат корумпирани поединци кои што го поткопуваат владеењето на правото и стабилноста на Северна Македонија. Корупцијата има последици“. – наведе Амбасадорката Анџела Агелер во својата реакција откако САД на црната листа стави уште едно познато лице, овојпат од бизнисот.
