КАКО ДОСЕГА УЛТРА ПРОФИТАБИЛНАТА ПРИЛЕПСКА КОМПАНИЈА ВЛЕЗЕ ВО ЗАГУБА – лани со чиста добивка од 15 милиони евра, во првиот квартал со минус од 50 илјади

Една од досега најпрофитабилните компании, Мермерен комбинат од Прилеп, објави загуба во работењето за првите три месеци од годинава. 

Загубата изнесува 54 илјади евра во периодот од први јануари и заклучно со крајот на март годинава. 

За илустрација, минатата година Мермерен комбинат од Прилеп ја заврши со добивка од дури 15 милиони евра, што, пак, беше раст за 8 проценти во однос на претходната 2023 година.

Од компанијата објавуваат дека причина за загубата се намалените приходи, поради лошото време во јануари и февруари, потоа ликвидацијата на залихи, како и зголемените цени на концесиите.

„За периодот од 1 јануари до 31 март 2025 година, Друштвото генерираше приходи од
продажба во износ од 214.441 илјади денари, што претставува намалување од 45% во
споредба со истиот период минатата година. Падот на продажбата се должи првенствено
на неповолните временски услови во јануари и февруари, кои сериозно го нарушија
производството на мермер и значително го намалија производството во текот на
тромесечието.
Зголемувањето од 55 отсто на цената на продадените производи главно се припишува на
ликвидацијата на стари залихи, поточно, фабричките залихи стари над 10 години кои
останале непродадени во претходните години. Оваа залиха носеше големи историски
трошоци и еднократното расчистување материјално влијае на структурата на трошоците
за тромесечието.
По измените на Тарифата за одредување на износот на надоместоци за издавање дозволи
и концесии за спроведување на детални геолошки истражувања и концесии за
експлоатација на минерални суровини, објавена во Службен весник од 25
декември 2024 година, концесискиот надоместок бележи зголемување за 122 отсто во
споредба со минатата година.
Во однос на оперативните трошоци, најголема компонента остануваат трошоците за
вработените, кои покажуваат зголемување од 12 отсто во споредба со истиот период
минатата година. Енергијата, суровините и потрошниот материјал – втората најголема
категорија на трошоци – се зголемени за 19 проценти. Спротивно на тоа, трошоците за
надворешни услуги се намалени за 41 отсто. Трошоците за амортизација за периодот
изнесуваат 33.752 илјади денари, што претставува пад од 8 отсто споредено со истиот период
минатата година“, објаснуваат од компанијата. 

Како резултат на овие фактори, Мермерен комбинат прикажува негативен оперативен профит од
(5.550 илјади денари), со нето загуба по оданочување во износ од (3.322 илјади денари). 

„Сепак, EBITDA за периодот остана позитивна на 28.202 илјади денари, нагласувајќи ја
издржливоста и профитабилноста на основните операции на Друштвото“, објаснуваат од прилепското акционерско друштво. 

Гледајќи напред, велат оттаму, во следните квартали се очекува закрепнување.

„Друштвото планира
зголемување на нивото на производство и капацитетот и одржување на стабилни,
профитабилни операции. Ова ќе биде поткрепено и со континуирани напори за контрола
и оптимизирање на трошоците, што ќе резултира со подобрување на финансискита
состојба во следните квартали“, се вели  во образложението прилоѓено заедно со Билансот на успех за првите три месеци од годинава.

Н.Н.Ф.