Извештајот за непотребните операции нема да биде јавно објавен поради заштита на пациентите
Министерот за здравство, Азир Алиу појасни дека целосниот извештај од странската експертска комисија, кој потврди сомнежи за непотребни операции во девет случаи, нема да биде достапен за јавноста.
Причината за ваквата одлука е заштитата на приватноста и медицинските податоци на третираните пациенти.
Министерот потенцираше дека извештајот содржи премногу сензитивни детали кои подлежат на Законот за заштита на личните податоци.
Според Алиу, во вакви специфични случаи не е доволно само да се сокријат имињата. Комбинацијата од дијагнози, датуми на интервенција и специфични клинички текови може лесно да открие за кои пациенти станува збор.
Одлуката е донесена согласно член 25 од Законот за заштита на правата на пациентите, кој гарантира тајност на медицинската документација.
Странската комисија изврши независен увид на 13 претходно издвоени предмети. Резултатите покажуваат дека кај 9 пациенти постојат сериозни сомнежи за несоодветни дијагностички евалуации и индикации за хируршки процедури.
