Митева: Нема потреба од предвремени избори, СДСМ ги очекува уште посериозен пораз од тој пред 2 години!
И покрај високата доверба што, според анкетите, ја ужива владејачката партија, Владата останува на ставот дека на Македонија ѝ е потребен период на политичка стабилност и реализација на ветените проекти, наместо нов изборен циклус. Ова го истакна владината портпаролка Марија Митева во гостувањето на 4ТВ, одговарајќи на прашањето дали се размислува за предвремени парламентарни избори.
Митева нагласи дека доколку Христијан Мицкоски и ВМРО-ДПМНЕ се воделе исклучиво од партиски калкулации и актуелниот политички рејтинг, избори би можеле да се организираат веднаш, но државниот интерес бара поинаков пристап.
„Ако го гледаме нашиот тесно политички интерес, би можеле веќе утре да одиме на избори согласно анкетите кои покажуваат несомнена доверба. Но, гледајќи го државниот интерес, не смееме да ја вовлекуваме државата во нов циклус кој троши време и пари, а ја запира реализацијата на проектите. Ова е реформска година на сериозни инвестиции и сметаме дека изборите треба да бидат редовни“, изјави Митева.
Таа потенцираше дека владината коалиција е стабилна и целосно фокусирана на реализација на програмските определби, но додаде дека власта е подготвена за изборно соочување со граѓаните во секој момент.
Во интервјуто, Марија Митева упати и сериозни критики кон СДСМ, оценувајќи дека повиците за избори доаѓаат од партија која се соочува со внатрешна нестабилност и недостаток на визија.
„Не гледам дека СДСМ е подготвена – ниту кадровски, ниту имаат визија или програма. Кај нив владее идентитетска криза. Од една страна велат дека се за ЕУ, а од друга излегуваат од работни групи за реформските закони. Кога ќе се спомнат избори, кај нив се чувствува страв и паника. Верувам дека на следните избори ги очекува уште посериозен пораз од оној пред две години“, рече Митева.
Таа потсети и дека опозицијата не го поддржала предлогот за укинување на техничката влада, што според неа претставува уште еден показател за, како што рече, „политичката какафонија“ во која се наоѓа македонската опозиција.
