Изет Меџити му честиташе на Албин Курти за победата на косовските парламентарни избори
Партијата „Самоопределување“, предводена од премиерот Албин Курти, оствари убедлива победа на вчерашните парламентарни избори во Косово, покажуваат прелиминарните официјални резултати на Централната изборна комисија (ЦИК). Според податоците објавени по пребројувањето на гласовите од околу 95 отсто од избирачките места, „Самоопределување“ освоила 49,79 отсто од гласовите.
На второто место се најде Демократската партија на Косово (ПДК) со 21,18 отсто од гласовите, додека третопласиран е Демократскиот сојуз на Косово (ЛДК) со 13,77 отсто. Овие резултати навестуваат можност за надминување на политичкиот застој кој во изминатиот период ја парализираше земјата.
По објавувањето на прелиминарните резултати, Курти порача дека е неопходно брзо формирање на институциите.
„Мораме да дејствуваме што е можно побрзо за да ги воспоставиме институциите“, изјави тој, повикувајќи ги опозициските партии на соработка во парламентот, „во интерес на граѓаните и народот“ на Косово.
На претходните избори одржани на 9 февруари, „Самоопределување“ освои 42 отсто од гласовите, што не беше доволно за формирање влада, поради што земјата повторно излезе на предвремени избори. Конечните резултати ќе бидат објавени по целосното пребројување на гласовите од дијаспората.
За самостојно формирање влада, потребни се најмалку 61 пратеник во парламентот со вкупно 120 места. Излезноста на изборите изнесуваше околу 45 отсто, што претставува зголемување во однос на февруарските избори, кога гласаа 40,6 отсто од запишаните гласачи.
Политичката стабилност е од особено значење во наредниот период, бидејќи парламентот треба да избере нов претседател и да ратификува кредитни договори во вредност од една милијарда евра со Европската Унија и Светската банка, кои истекуваат во наредните месеци. Нов неуспех во формирањето влада би ја продлабочил кризата во чувствителен момент за земјата.
Опозициските партии досега одбиваа коалиција со Курти, критикувајќи ги неговите односи со западните сојузници и политиките кон етнички поделениот север на Косово, каде живее српското малцинство. Од друга страна, Курти ја обвинува опозицијата за продолжувањето на институционалниот застој.
Во меѓувреме, честитки за изборниот резултат пристигнаа и од регионот.
Градоначалникот на општина Чаир и еден од лидерите на коалицијата ВЛЕН, Изет Меџити, му честиташе на Курти, оценувајќи дека победата на „Самоопределување“ е „добра вест што доаѓа од Косово“ и потврда за демократскиот капацитет на земјата.
