ИЗДАДЕНИ ПОМАЛКУ ОДОБРЕНИЈА ЗА ГРАДБА, АМА ЌЕ НИКНАТ ПОСКАПИ ОБЈЕКТИ – најмногу ќе се гради во Скопскиот регион, еве ги деталите
Во септември годинава се издадени 296 одобренија за градење, што е за 9,2 проценти помалку во однос на истиот месец од претходната година, соопшти Државниот завод за статистика.
Според издадените одобренија за градење, предвидената вредност на објектите изнесува 7.517.775 илјади денари, што е за 12,6 отсто повеќе во однос на истиот месец од претходната година.
Од вкупниот број на издадени одобренија за градење, 146 или 49,3 отсто се наменети за објекти од високоградба, 90 или 30,4 проценти за објекти од нискоградба и 60 или 20,3 проценти за објекти за реконструкција.
– Од вкупно 296 објекти, на 131 или 44,3 проценти како инвеститори се јавуваат физички лица, а на 165 или 55,7 отсто објекти инвеститори се деловни субјекти.
Во извештајниот период е предвидена изградба на 755 станови, со вкупна корисна површина од 67.372 метри квадратни – се наведува во соопштението на ДЗС.
Податоците објавени во нивната анализа покажуваат дека најголем дел од одобренијата се за градби во Скопскиот регион, за каде се издадени 74 одобренија. Веднаш по него е Полошкиот регион со 67 одобренија за градба. Додека на трето место според издадените одобренија е Југоисточниот регион со 47 одобренија за градба.
