Инспектори од Агенцијата за цивилно воздухопловство влегоа во М-НАВ
Инспектори од Агенцијата за цивилно воздухопловство од сабајлево вршат вонреден надзор во Македонска навигација (М-НАВ) по физичкиот напад што се случи вчера кон еден од контролорите на летање во зградата на оваа институција.
Директорот на АЦВ, Томислав Тунтев во изјава за весникот ВЕЧЕР вели дека испратени се инспектори од делот за обезбедување и од делот за безбедност со цел да се соберат сознанија што точно се случило и дали евентуално настанало загрозување на безбедноста од било кој аспект.
Струковиот Синдикат на Контролорите на Летање – ССКЛ денеска извести за безбедносни пропусти во службите кои се задолжени за обезбедување на објектот и лицата вработени во објектот на Контролата на летање, како и соучесништво од страна на лица кои се вработени во македонската навигација кои го потпомогнале влезот на неовластените лица кои го нападнале контролорот.
– Ние постапуваме затоа што не постои пријава за настанот, се решивме за вонредна контрола од она што го слушаме или читаме во медиумите и реагираме по допрен глас. Ако се утврдат недостатоци во процедурите или постапките на службата за обезбедување, или имало потенцијална опасност за воздушниот сообраќај, ќе следат потребните корективни мерки или мерки на санкции согласно нашите надлежности – вели Тунтев.
Според негови сознанија, со инцидентот во Контролата на летање немало намера да се загрози безбедноста на авиосообраќајот, туку станувало збор за нарушени меѓучовечки односи кои кулминирале со тепачката, што никако не смеела да се случи во таков објект од голема државна безбедност.
Главна функција на АЦВ е обезбедување на безбедносното работење на субјектите на воздухопловната индустрија и безбедносно одвивање на целокупното воздухопловтво.
Од скопското Основ но јавно обвинителство велат дека се преземаат дејствија за расчистување на настанот.
– Основното јавно обвинителство Скопје во текот на денот очекува кривична пријава од Министерството за внатрешни работи, а за натамошната постапка соодветно ќе ја информира јавноста – велат од ОЈО.
(С.Бл.)
