Индија изврши воздушни напади врз девет цели во Пакистан
Напнатоста меѓу Индија и Пакистан повторно ескалираше откако индиските вооружени сили синоќа извршија воздушни напади врз девет цели на територија на Пакистан и во спорниот регион Џаму и Кашмир, кој го администрира Исламабад, соопшти утрово индиската армија.
Според соопштението, акцијата била дел од операцијата „Синдор“ и била „фокусирана, умерена и неескалирачка по природа“. Индиската армија нагласи дека нападите не биле насочени кон пакистанските воени сили, туку дека биле внимателно избрани цели, без цел да се поттикне дополнително насилство.
„Индија покажа значителна воздржаност. Ниту една пакистанска воена база не беше погодена. Нашата акција беше насочена, одмерена и не предизвика ескалација“, се наведува во соопштението објавено од Би-Би-Си.
Операцијата следува по смртоносниот напад врз туристи минатиот месец во индискиот дел на Кашмир, за кој властите ги обвинуваат милитантите со поддршка од Пакистан. Во тој напад загинаа 26 лица.
Медиумите објавија видео-снимки со звуци од експлозии во близина на градот Музафарабад во пакистанскиот дел на Кашмир, при што очевидци изјавија дека настанала прекин на електрична енергија. Според западни извештаи, се слушнале повеќе силни експлозии на неколку локации.
Индиската армија на социјалната мрежа X објави порака во која се наведува: „Правдата е задоволена, победа за Индија“, придружена со хаштагот #PahalgamTerrorAttack, што се однесува на нападот врз туристите.
Пакистан, од своја страна, одговори со артилериски напади врз областа Бхимбер Гали во регионот Пунч-Раџаури, на индиската страна од Кашмир. Портпаролот на пакистанската армија изјави дека Исламабад „ќе одговори на нападот во време и на место што самиот ќе го одреди“.
„Сите наши борбени авиони се во воздух. Ова е срамен и кукавички напад што дојде од индискиот воздушен простор“, додаде портпаролот Ахмед Шариф Чаудри за телевизијата Гео ТВ.
Чаудри потврди дека во нападите загинале најмалку три лица – двајца цивили во областа Котли и едно дете во градот Ахмедпур Исток. Повредени се најмалку уште 12 лица.
Американскиот претседател Доналд Трамп ја осуди акцијата на Индија, оценувајќи ја како „срамна“.
