ХРВАТСКА Е ОКОВАНА ВО СНЕГ: Метеоролог ги повика граѓаните да ги одложат патувањата ако можат
Tрет ден снегот создава сериозни проблеми во Далмација во Хрватска.
Снежната покривка е дебела 70 сантиметри. Целосно затворени се патиштата од Грачац до Книн, Грачац до Обровац, Свети Рок – Госпиќ, Госпиќ – Карлобаг и други. Автопатот А6 од Риека до Загреб е отворен само за автомбили, како и Јадранската магистрала на некои места, и Пашкиот мост. На релација Сплит – Загреб денеска освен двата редовни возови ќе има и еден дополнителен вонреден воз, со 135 седишта. Еден од најпознатите метеоролози Зоран Вакула вели дека овие услови не се невообичаени.
„Да, падна околу половина метар снег дуваше силно, но во историјата наидуваме на многу посилни и потешки временски услови. Ми делува дека поради размерно благите зими со ретки вакви ситуации во последните децении, како малку да сме подзаборавиле во кое поднебје живееме, а можеби си допуштаме и повеќе отколку порано, потпирајќи се на авотпатите и на автомобилите… Требаше само да ги следиме временските прогнози и извештаите“, вели тој.
Препорачува, доколку е можно граѓаните да почекаат со патувањето, барем до викендот. Дотогаш се очекува нормализирање на времето. И Србија е окована со снег, а деновиве во одредени општини немаше струја. Хаос имаше во западна Србија.
