Хрват пукал во маж за кој се сомневал дека е љубовник на жена му, а потоа бркал друг човек поради пари
Маж во Хрватска пукал во еден човек поради жена, а потоа бркал друг поради пари.
Бранко Мамиќ, пензиониран полицаец кој денеска тешко ранил маж во Трогир, во мај е неправосилно осуден за седум кривични дела против сопругата и децата, а по пукањето во далматинскиот град тргнал во потрага по уште еден маж. Судот на Мамиќ му изрекол казна од две и пол години затвор, од кои требало да одлежи десет месеци, додека остатокот од казната бил условно одреден со рок на проверка од пет години. Поранешниот полицаец е обвинет за семејно насилство откако дивеел дома пред сопругата и петте деца, уверен дека сопругата го изневерува со соседот.
Тој физички ја нападнал сопругата, држејќи притоа пиштол и заканувајќи се дека ќе ги убие сите, а во еден момент пукал и во ѕидот. По четири месеци минати во притвор, Мамиќ по пресудата е пуштен на слобода.
Мамиќ во младиот маж пукал во центарот на градот затоа што во налет на љубомора се сомневал дека тој е љубовник на неговата сопруга, бидејќи пред некое време пронашол пораки од него во мобилниот телефон на жената. Сепак, според истите приказни, момчето немало такви или слични аспирации кон сопругата на Мамиќ, туку сè се сведувало на пријателски односи.
Мамиќ од местото на пукањето побегнал вооружен на мотор и тргнал во потрага по уште еден маж, кого го обвинува за својот финансиски крах.
Во потера по поранешниот полицаец тргнале полицајци, а локалните медиуми пишуваат дека на островот Чиово во тек е полициска акција во која е обиколена куќа во која наводно се крие Мамиќ.
