Хипокризијата на Карло Анчелоти
Во првенството е на делба на првото место со натпревар повеќе од Барселона, во Лигата на шампионите стигна до четвртфиналето, а во Копа дел Реј до полуфиналето со огромна шанса да дојде и до мечот за трофејот бидејќи има 1-0 од гостувањето кај Сосиедад. Сепак, како една од најмаркантните работи од оваа сезона во Ла Лига, ќе остане хистеријата која ја создаде Реал поради судењето во досегашниот дел од сезоната.
Свој удел во тоа имаше и тренерот Карло Анчелоти иако за него не е типично да се меша во работата на арбитрите. По мечот против Атлетико во средата, до израз дојде неговата хипокризија кога станува збор за судиите.
Не така одамна, пред точно еден месец, на прес-конференција тој жестоко протестираше за неколку судиски одлуки кои, според него, довеле до губење бодови на Реал. Мадридскиот тим беше во лоша серија, на три меча по ред не успеа да победи, а виновниците, според Анчелоти, беа „луѓето во црно“.
„Многу работи се случија во последните три натпревари кои сите ги видоа. Нема да кажам ништо повеќе бидејќи сакам да бидам на клупата на следниот меч. Црвениот картон што го доби Белингам беше само знак дека судијата е нервозен, ништо повеќе. ВАР не ги провери ситуациите во противничкиот шеснаесетник иако имаше барем 2-3 такви моменти“, зборуваше Анчелоти по ремито против Осасуна откако и претходно на големо ги коментираше судиските одлуки.
Спорен момент имаше и во средата, на дуелот против Атлетико, но сега во корист на Реал. Хулијан Алварез при изведувањето на пеналот, два пати играше со топката, главниот судија доби сугестија од ВАР собата да го поништи голот што го постигна Аргентинецот, а тоа предизвика бура од реакции од таборот на Атлетико. Очекувано, изјавата на Анчелоти денеска не беше толку драматична.
„Се создаде голема бура околу пеналот на Хулијан Алварез. За нас тој натпревар заврши и ние сме сконцентрирани на следниот. Не знам какво е правилото за два контакта при изведување пенал, но такво е и мора да го почитуваме“, рече сега Италијанецот, одбивајќи да коментира премногу кога неговиот тим има корист од спорната судиска одлука.
Иста реакција како него имаа и неколку фудбалери и членови на управата на Реал. Куртоа и Белингам долго време се жалеа на судиските одлуки во Шпанија, но сега ги нападнаа членовите на Атлетико дека „само плачат“ и дека изигруваат жртви.
